खीर खाणी खैगे, पात चाटणी हाथ पड़।
मतलब मुख्य अपराधी भाज गै, वीक दगड़ी पकड़ी गै
जो काकौक लै खूंल कौं, बाज्युक लै नी खै जान।
मतलब जो दूहरै की सम्पतिक लालच करुं, ऊ आपुण सम्पति लै गवैं दियूं।
दैकी ठेकी पाल भीतेर, नमस्कार वाल भीतेर।
मतलब व्यापार/व्यवहार कै और दगड़ और दिखावा कै और कैं।
मडू फ़ोक्योल, तो आफ़ि दिख्यौल।
मतलब मेहनतौक परिणाम सबूं कै सामणी ऎ जां।
चौमासैकि घस्यार, ह्यूनैकी रस्यार।
मतलब मौक देख बेर आपुण अनूकूल काम ढूंढ्नी।
भल भल मर गया, कुकुराक च्याल पधान।
मतलब योग्य व्यक्ति नी मिलण पर अयोग्य व्यक्ति लै महत्वपूर्ण है जां।
हुणी च्यलाक गणु, आफ़ि आफ़ि बाजनी।
मतलब छू होनहार बीरवान के होत चिकने पात।
जे जस ते तस, मुसौक पोथिल मुसै जस।
मतलब जस बाप उसी औलाद।
अघैन बामणैकि, भैसेन खीर।
मतलब खाणैकि ईच्छा ना हुण पर बहानेबाजी करण
तातै खूं जयी मरूं।
बहुत जल्दीबाजी करण
सासूल ब्वारी थैं क,
ब्वारिल कुकुर थैं क,
कुकुरैल पूछड़ हिलै दी।
मतलब आपूंण काम दुहर पर थोपण।
जब पेट में लागी आग,
तब क्ये चाईंछ साग।
मतलब भूख लागण पर खाण में क्येलै मिल जाओ|
ब्वारी खाली छै, तो बल्दौक पुठ कन्या।
मतलब बेकार काम में लगौण
भिकानाक चंदन लगौण।
मतलब बेकार काम में लागी रौन।
क्ये शोकैल खै, क्ये रोगैल खै।
मतलब हर तरफ़ बटी स्वास्थ्य खराब हुण।
पितर करी, नातर पीड़ाये।
मतलब पितररोंक करम उनरी औणी संतान कैं परिणाम दिनी।
अनाव चोट, कनाव लागण।
मतलब अप्रत्याशित परिणाम मिलण।
जैकि ज्वे नै, वीक क्वे नै।
मतलब पत्नीविहीन व्यक्ति कैं क्वे नी पूछ्न।
चेली हैं कौंण, ब्वारी कैं सुणौन।
मतलब दुहर कैं सुणै बेर(इनडाईरेक्ट) बात करण।
मुसैकी गाव गाव, बिराऊक खेल।
मतलब कैके दु:ख में क्वे दुहर आनन्द प्राप्त करना
तुमड़ जस ओसे रौ।
मतलब भौत नाराज हैरौ।
अति बिराऊं में मुस नी मरन।
अर्थात अति क्ये चीजै की लै भली नी हुनी
नान-नान बल्दाक ठुल ठुल सींग।
मतलब आपुण हैसियत है बड़ी बात करण।
देखी मनखी क्ये देखण, तापी घाम क्ये तापण।
अर्थात जांची परखी तथ्य में क्ये शंका नी भै
म्यर जस भीन केक नै,
म्यर भीन एक नै।
मतलब बिना बात महिमामंडन करण
नख माथ बै मास नै,
झूनी आगी गौं नै।
मतलब नखोंक माथ में मांस न्हाति और झूनी है आगि क्वे गौं न्हाति
भुटन कम कम, और चड़कन झक झक।
मतलब कम बातक लै ज्यादा प्रचार करन।
मरण बखत बाकर गुसैंक मुख चां।
मतलब छू मुसीबत/जरुरताक टैम लोग आपुण रिश्तेदारों और मित्रों है मदद मांगनी
बुति करा का छै माणा,
गाल मारा का नौ माणा।
मतलब छू मेहनत करण वाल है बात बणौनी ज्यादा फ़ैद ली जां
बागैल मारो तो दौण रीतो, भ्येव पड़ो तो दौण रीतो।
मतलब छू नुकसान कसिक लै हो भुगतन पडूं
कला करूं विद्या करूं दाता ने दिन तो मैं क्या क्या करूं।
मतलब आदिम कतुक लै प्रयत्न करो, ईश्वर की ईच्छा बिना फ़ल प्राप्त नी हुन
नी खांण घर में चौमासी जर|
मतलब गरीब घर में विपदा पर विपदा औंण
अलूणी मरचौक बरबराट|
मतलब बिना अपराध सजा या अचानक भारी कष्ट
किस्मतौक देखो खेल,
पढ़ी फारसी बेचूं तेल|
मतलब अगर किस्मत साथ ना दे तो गुणी मनखी लै लाचार है जां
बण सुंगर ले उज्यांड़ खै,
घर सुंगराक थोल थेचा।
मतलब छू अपराध क्वे और कर गे और सजा क्वे और कैं मिली|
बिराऊ मारण सबूंल देख,
दूध पीण कैले नी देख।
मतलब दोषी मनखिक दोष कैले नी देख, पर सजा दिणी वालौक दोष सबूं कै देखी|
जैक आन्ख सौण में गाड़,
कैं हरियो हरि सुझ।
मतलब बिना परिस्थिति कैं देखी, आपुण अनुसार निर्णय करण।
जैक जांठ, वीकै बांट।
मतलब छू सशक्त व्यक्ति की सब जाग पूछ।
ऊंट कि बलै, भिकानाक ख्वर।
मतलब छू कैके दोष कै और पर दिण।
माघ में खै आम,
फागुन में लाग घाम।
मतलब कुतर्क या बिना आधार तर्क करण।
भूतों कैं ल्याख,
द्याप्तों कैं धांक।
मतलब अयोग्य व्यक्ति कैं योग्य व्यक्ति है ज्यादा महत्व दीण।
No comments:
Post a Comment